၂၀၁၂-၂၀၁၃ စာသင်နှစ်အတွက် စင်ကာပူအစိုးရကျောင်းလခများ တိုးမြှင့်တော့မည်

စင်ကာပူအမျိုးသားတက္ကသိုလ်အပါအ၀င် အစိုးရတက္ကသိုလ် (၃) ကျောင်းနှင့် ပိုလီကျောင်းများ၊ ITE ကျောင်းများ၏ ၂၀၁၂-၂၀၁၃ စာသင်နှစ်အတွက် ကျောင်းလခများတိုးမြှင့်တော့မည်ဖြစ်ကြောင်း CROWN Education မှသိရသည်။ စင်ကာပူအမျိုးသားတက္ကသိုလ်မှ ကျောင်းလခများကို စင်ကာပူဒေါ်လာ ၇,၄၆၀ သို့ ၄ ရာခိုင်နှုန်းတိုးမြှင့်မည်ဖြစ်ပြီး အဆိုပါအစီအစဉ်မှာ နှစ်စဉ် ၁.၆ ရာခိုင်နှုန်းတက်မည့်အစီအစဉ်၏ အကျိုးရလဒ်ဖြစ်ကြောင်း သိရသည်။



သို့သော် Architecture, Business, Dentistry, Law, Music, Medicine, Nursing, နှင့် Pharmacy ပရိုဂရမ်သင်ယူမည့်အတွက် ၆ ရာခိုင်နှုန်းတိုးမြှင့်မည်ဖြစ်သည်။ ဥပဒေနှင့်ပတ်သက်သည့် ဘာသာရပ်များကို စင်ကာပူဒေါ်လာ ၁၀,၀၀၀ အဖြစ်လည်းကောင်း၊ ဆေးပညာနှင့်ပတ်သက်သည့် ဘာသာရပ်များကို စင်ကာပူဒေါ်လာ ၂၁,၇၄၀ နှင့် Lee Kuan Yew School of Public Policy မှကျောင်းလခများကို ၈ ရာခိုင်နှုန်းအထိလည်းကောင်း အသီးသီးတိုးမြှင့်သွားမည်ဖြစ်သည်။ “နှစ်စဉ်နည်းနည်းစီတက်နေကျပါ။ ဘာသာရပ်တစ်ခုချင်းစီအတွက် အသေးစိတ်မထုတ်ပြန်သေးပါဘူး။ ဒါပေမဲ့ ဒီနှစ်မှာထူးခြားတာက ထုတ်ပြန်လိုက်တဲ့ရာခိုင်နှုန်းတွေအရ စင်ကာပူနိုင်ငံသားတွေပေးရမယ့် ကျောင်းလခနဲ့ အမြဲနေထိုင်ခွင့်ရတဲ့သူ (PR) တွေ၊ နိုင်ငံတကာကျောင်းသားတွေ ပေးရမယ့်ကျောင်းလခက တော်တော်လေးကွာသွားတာ တွေ့ရပါတယ်။ အထူးသဖြင့် ပိုလီကျောင်းလခတွေတက်တာ ပိုများပါတယ်။ ကျွန်တော်တို့ဆီက ကလေးအများစုက ပိုလီကိုစိတ်ဝင်စားကြတာဆိုတော့ အတိုင်းအတာတစ်ခုအထိတော့ သက်ရောက်နိုင်ပါတယ်။ ဘာကြောင့်လဲဆိုတော့ ဒီပလိုမာရဖို့ သုံးနှစ်တက်ရတဲ့ပိုလီကျောင်းရဲ့ ပထမတစ်နှစ်စာကျောင်းလခဟာ၊ တစ်နှစ်ထဲတက်ရမယ့်အပြင် ကျောင်းကဒီပလိုမာထက် ဈေးမြင့်လာနေလို့ပါ” ဟု CROWN Education မှပညာရေးအတိုင်ပင်ခံ ဦးအောင်ကျော်ဆန်းက သုံးသပ်ပြောကြားသည်။ ITE မှာ မြန်မာနိုင်ငံမှကျောင်းသားများအား လက်မခံတော့သည့်အတွက် ITE ဈေးနှုန်းနှင့်ပတ်သက်၍ အကျိုးသက်ရောက်မှုမရှိနိုင်ကြောင်း သိရသည်။ NUS မှ Nursing Graduate Research ဘာသာရပ်အတွက် ပြောင်းလဲမည်မဟုတ်ဘဲ ကျန် Graduate Research ဘာသာရပ်များအတွက် ၈ ရာခိုင်နှုန်း အသီးသီးတိုးမြှင့်သွားမည်ဖြစ်သည်။ ယခုကဲ့သို့တိုးမြှင့်လိုက်သည့်အတွက် အစိုးရကျောင်းများတွင်တက်ရောက်မည့် နိုင်ငံတကာကျောင်းသားများနှင့် အမြဲနေထိုင်ခွင့်ရသူများ (PR) များမှာ စင်ကာပူနိုင်ငံသားများထက် ၃၂ ရာခိုင်နှုန်းမှ ၈၄ ရာခိုင်နှုန်းအထိ များပြားသွားမည်ဖြစ်သည်။ စင်ကာပူအမျိုးသားတက္ကသိုလ်အနေဖြင့် ဘဏ္ဍာရေးလိုအပ်ချက်ရှိသူများကို ပိုမိုထောက်ပံ့ပေးနိုင်ရန်လည်းစီစဉ်ထားပြီး စင်ကာပူဒေါ်လာ ၄.၅ သန်းအထိ ထောက်ပံ့သွားမည်ဖြစ်ကာ စုစုပေါင်းအထောက်အပံ့ စင်ကာပူဒေါ်လာ ၉.၅ သန်းထောက်ပံ့ရန် စီစဉ်ထားကြောင်းဖော်ပြထားသည်။